連續五日長假仲剩返兩日，如果攞埋星期三至五大假嘅話，就可以放一個超Long Vacation喇，可惜今年有幾長假都無得去旅行，最多都係響香港Staycation或者露營，當然仲可以三五知己去吓行山，或去主題樂園開心吓嘅。
啱啱過去嘅4.01，除咗係愚人節，亦係哥哥Lesile離世18周年，當晚亦有官方嘅悼念活動《想你張國榮》音樂會，形式同之前歌神Sam Hui及舞皇aaron Kwok一樣，經「健康．旦」平台直播，地點亦都係響尖沙咀海運大廈嘅天台舉行，今次仲搵嚟浸大交響樂團演奏，而嘉賓陣容都好強勁，唔響度講太多喇，想重溫嘅話可以嘟吓個QR Code。
自從舊年2020年開始，4.01再多一重意義，事關呢一日係香港5G網絡正式啟用嘅大日子，仲記得舊年嘅4.01凌晨，編者同同事一齊測試本地5G網絡，甚至響巴士拍片測速，不過當時覆蓋範圍主要係黃金地段一帶嘅市區，睇返一年後嘅今日，本地5G網絡基本都已覆蓋到絕大部分戶外地區，響疫情肆瘧嘅情況下，呢個進展算係令人滿意，各大網絡商都算係兌現咗佢哋承諾。
嚟緊下一步，除咗將5G覆蓋引入至更多室內、隧道、鐵路管道等之外，另一大方向相信會係向商業應用層面發展，其實各大網絡商已經推緊好多唔同嘅方案，例如3HK推出咗「5G Live Up直播方案」、5G Live「直播KOL夢工場」培訓課程、為唔同行業度身訂造5G商業應用方案；SmarTone就有「Home5G寬頻服務」、「5G智慧交通安全管理系統」、「5G智慧商場」；CMHK同地產商合作搞5G智能大廈，csl亦有「DrGo遙距醫療服務」同埋《全民造星III》決賽5G特別版超高清節目直播等等。由此可見，各大網絡商已經響5G方面積極做緊嘢，所以響嚟緊嘅日子，各位用家應該好快會接觸到更多5G嘅新用途。
5G起步咗一年，今時今日仲未算得上普及，除咗有網絡同應用方案/服務之外，手機同月費計劃都要有所配合先得，睇返過去一年，其實有唔少品牌都陸續推出中價甚至入門嘅5G手機，有更多選擇之餘，加上各大網絡商嘅競爭激烈，相信響月費方面嚟緊會更吸引。
編者響5G始動呢一年入面，都測試過唔少5G手機，感覺係良好嘅，有朋友問到都會推介佢哋試下5G手機連月費，不過5G最終嘅目標係IoT，又睇吓下一年2022，亦即係5G兩周年嘅時候，本地以至全世界5G嘅發展又會去到咩地埗啦！
